Home » » Tah a tul leh thin

Tah a tul leh thin

Phuahtu : Zirsangzela Hnamte
Satu : Zirsangzela Hnamte

I sakhming sawi leh tahlai ka bang thei lo,
Tufa chawi a damten kan tih lai a;
Ti mai a zochhum ang sar a i zamral hi,
Ka tuar thiamlo i thai suihlung mawl mai hian.

Aw hnemtu ka va ngai em ve aw,
Famzun ngai a damchhung ka hmang tur hi;
Fur leh thal lo veiin par tin an vul leh a,
Thinlai thar in fam ngai tah a tul leh thin.

Tuantul vanga thangvan sang i kai ni khan,
Kar lohvah sul ang hawn min tiam a;
Mahse kan nghah ni che a rei ta lua e,
Run in chhung leh kan nun kawl ang a uai zo ta.

Sul ang hawng tur kan nghah ni a rei ta emai,
Sikni liam in tuangtuah an vul leh ta;
Chhungkim te a dar ang kan lenna run nuam kha,
Ngai chungin mittui nen then a lo tul ta.

Murva iang i lenna ka chung thangvan zau an,
I lenrual te mu ang leng thin in;
Suihlung a vai emai khawi an tuan ve che maw?
Min han thlir ve che maw rauthla leng talin.

Saisen te a ka chawi ka hrai duh leng te,
Tui ang damten min chawilen pui a;
Han thlir ve teh maurua iang an tuai lian ve ta,
Ka hlimna tur zawng pawh tahna an chantir e.

I sul i hnu silhphuan leh i hlimthla mai hi,
Ka chantawk tur a nih tak si chuan;
Puan ang i hlui dawn silo aw ka thinlai an,
Thlir changin suihlunglen dawn a sei dawn mang e.



Share this article :

1 comments:

Thangpi Naulak said...

Guitar Chords dah tel thei la tha tur

Post a Comment

 
Copyright © 2008. Four Brothers' Mizo Lyrics - All Rights Reserved
Back To Top
Design: ToMZ