Home » » Luah loh lungdi

Luah loh lungdi

Phuahtu: Lalzova, Darchhunga, Vankhama (He hla phuahtu ber hi a chiang lo)
Satu: H. Lalchawimawii

Ka rawn fang leh hmana kan tuanna tlang,
Tuahpui leh vau an vul leh ta;
Kan sulihnu khuarei an chang zo ta,
Hring leh thar hnahnem ten lo bawm.

Tawngmang em ni, lunglem ka nei lo,
Ka hawi vel a ka tawng silo;
Zunleng erawh a cham tanglai ah,
Luahloh lungdi nghilhni i awm lo.

Hmanah chuan e a bahsam thla mawi ah,
Ka thliah senhri nauban a tawn;
Tunah erawh vul leh sang thingler ah,
Thliah loh ten par vul tang' an ti.

Tawnmang silo maw kei zawng ka ringlo,
A mi tawn ah zamual i liam;
Kumtluang kha chen kha sul ang ka zui sa,
Heti mai a ka then tur hi.

Tawnmang lamah kan zalna run dang lo,
Hai ang thang suihlung lam vai e;
Ka chul ruai ruai kan zalna laikhum hi,
Ka thlehnem puan mai a lo ni.


Share this article :

4 comments:

Joel Lairemsanga said...

He hla phuahtu Lalzova in rawn ti mai hi chu in huai ngawtin ka hria. A phuahtu chungchangah thu inchuh a awm mek zel a la ni a, tanchhan tha tak tak pawh a awm ve ve asin. A thenin Lalzova, Darchhunga, Vankham phuah ber niin an hre bawk a, tu ber phuah nge tihah hian thutlukna felfai a awm thei dawnin a lang tawh lo.

Kei chuan Darchhunga phuah niin ka hre ve thung a, tanchhan pawh ka nei tha ve viau mai. " He hla hi naupang te ka nih lai atanga ka lo sak ve thin a ni a. Ka hriat ve dan lam sawi ka tum lo va, amaherawhchu Pu Vankhama phuah nia hria tam tak an awm a, tin, Lalzova phuah ngei a ni titu pawh tam tak an ni. Pu R. Lalrawna'n 'Fam Lalzova chanchin leh a hla phuahte' tih lehkhabu a siam atangin ka la chhawng ve mai a ni.

He hlabu ka buatsaih lai hian he hla hi tu phuah nge tih lam ka chhui lo va, tin, tumah ka zawt bawk hek lo. Chuti chung chuan hranghlui zaithiam pa pakhat chuan, "He hla hi Pa Vankhama khan ama phuah ngei a nih thu min hrilh asin," a ti a. Tin, a dang leh Mizo paah chuan Pa lar takin min hrilh dan chuan, "Pu Lalthankima khan 'he hla hi ka phuah asin,' a ti," tiin min hrilh bawk a. Engpawhnisela, Pu R. Lalrawna lehkhabu siam atang hian ka la chhuak ve mai a ni a; tin, Pu Vankhama phuah dan nia an sawi leh Lalzova phuah dan nia an sawi dan hetiang hi a lo ni ta a ni". - T. Lalhmingliana, Author of Lung Tileng (Page 21)

# Awle, he thu atang mai pawh hian a phuahtu chungchangah ngaihdan a awm nual tih a chiang a, hei hi a dik ber tihtlan theih hun a awm theih loh hlen dawn a nih hmel riau. Kei pawhin ka lo hriatphak leh chhiarphak document atang te, a phuah dan leh a kum leh ni, a ram hming leh leilung, a bialnu hming nen lama hre tura in rochuntu a tu leh fate thu atangte-in he hla hi Pu Darchhunga (a hnu lawka Kohhran Upa ni ta) phuah niin ka pawm ve tlat mai. A tu thenkhat pawh Vaivakawnah an la awm. Tin, September, 2003 Issue-a MUP TLANGAU chanchinbuah khan a phuah dan kalhmang an rawn ziah pawh ka lo chhiar ve ngei bawk a.

mizolyrics said...

@Joel Lairemsanga, he hla phuahtu inchuh chang i rawn ziak a kan lawm hle, kan huai em hran lo a, kan hriat loh vang zawk a ni mah e. He hla kan tarlan dawn hian Lalzova hla phuah te zingah sawi lan anih ve vang hian 'Phuahtu: Lalzova' tiin kan tarlang mai a, i rawn sawi na eng ah heng a phuahtu ni a i sawi ho hi kan tarlang vek mai ang a tha zawk dawn in ka hria. I comment a bengvar thlak in kan tih diklo i rawn hria a kan lawm hle tih min lo hriat sak dawnnia. Chuan i rawn sawi ho hi document nen meuh a lo chhiar tawh i ni bawk a kan ring a Phuahtu tih ah hian kan tarlang vek mai e.

Hruaitea Hauhnar said...

Vankhama phuah hi chu ka ring lem lo. Lalzova phuah angin Lehkhabu tam taka an ziah ka chhiar tawh. C. Chhuanvawra ngei pawn Lalzova phuah niin a ziak.

Zawlpala Khiangte said...

Hmanah chuan e a bahsam thlah mawi ah,
Ka thliah senhri nauban a tawn;
Tunah erawh vul leh sang thingler ah,
Thliah loh ten par vul tang' an ti.

Post a Comment

 
Copyright © 2008. Four Brothers' Mizo Lyrics - All Rights Reserved
Back To Top
Design: ToMZ