Shema

30 Apr 2015

Phuahtu: Lalnunpuia Hrahsel
Satu: Pensy B Lalthangliani


Bethani a nula sual pakhat chuan,
Rimtui kengin Krista a rawn pan a;
Alabasta hriak rimtui sawhkeh in,
Lungchhir luaithli nulin Lalpa pheilai a luang.

Shema, Shema, Shema, Shema,
Misual te thian i ni;
Shema, Shema, Shema, Shema,
Keipawh min ngaidam rawh.


Ami leng zawng ten lungte fawmin an sel,
Thinlung engphiar hmaipu in an diriam;
I sualte ngaihdam a ni ta tiin,
Belhtlak Isua chuanin ngaihdamna famkim a pe.

Keipawh Isu misual ve bawk ka ni,
Ka thinlung sawhkeh in ka lo kir e Lalpa;
Mi tawmkailo thlarau pachhia ka ni,
Lungchhir luaithli nulin ka rawn bel i angchhung.
Continue Reading | comments

Rui thei em mai min ti

Satu: Lalkima Zote

Hnaptla pur a ruih pawh in amak ngei sim har ka ti,
Ningzu dawn a nilen hi a lo nuam thin em a ni;
Sim leh mai hian ka mawi lo ningzu run ka belh lai chuan,
Mahse, khua ruat lo ni nge ka lo sim leh thei tho chu.

Ka chun leh zua unau ten ka lenrual lungduh te pawn,
Simla nghei tawh rawh min ti vanglai par ang a chuai hma hian;
Engtin nge tiang chherchhur chuan,

Nupui fanau pawh nei mahla i chawm zo dawn em ni min ti,
Sim la nghei teh, nghei tawh teh, Rui thei em mai min ti.


Hna lah thawk peih bawk si lo chhungte lah bum fing zo tawh,
Bat leh ringawt mai lah chu sum tam hlan a ngai leh thin;
Chun leh zua zawng an hlim ngei ningzu bawih tang chhuah meuh chuan,
An lenrual lungduh te pawn lawmpui awm ngei mai an ti.


Continue Reading | comments

Sikul ka kal peih lo

Satu: Alex RBa

Ka nu sikul ka kal peih lo,
Aw ka thiamthei lo si a hrehawm em;
Lehkhazir rawh tih reng mai zawng,
Dikber hian ka hre bik lo.

A thiamthei chi an awm a,
Thiamthei lo chi kan awm a;
Kan dinhmun hi tumah hian,
In dawn chiang lo.

Kan zirtirtu te tak pawh hi,
Ka dem dawn e, ka ngaihdan hian;
Thleihbik nei hian min zirtir a,
Thiamtheilo ho kan lungawilo nasa.

A thiamthei chauh in duhsak a,
A thiamthei ve lo te min hnualsuat a;
Engtinnge maw hetiang te chuan,
Kan thiam reng ang.

Homework thiamlo zingah pawh hian,
Thiam chak tak tak kan tam em;
Vuak tuar tur a sikul lo kal hi,
Kan chak bik lo kan ning em em.

Rum em em min melh a,
Hlau leh khurin kan ding a;
Min hmangaih vang a nih hi,
Kan ring si lo.

Kan duhber chu hei hi a ni,
Lehkhazir san kan duh ve a;
Hmangaihna in min enkawl a,
Puitling turin min chherchhuak em?

Chutin suihlungphang lo ten,
Sikul run kan lo kai a;
Chun leh zuapa thinlai na reng,
A dam ngei ang.
Continue Reading | comments

Miten an hmu ve lo

Phuahtu: Laltanpuia Tochhawng
Satu: Laltanpuia Tochhawng, Famkima, Hmingtea


Bawihte i hmangaihna aw nem chuan in,
Ka thinlung hliam a thawi dam thin;
I ngilneihna leh rinawmna te chuan,
Nitin min ti hlim thin.

I anka nem chuan min ti lawm thin a,
I len thla leh kimtlang ah chuan;
Hmangaihna eng zun a lo zam chiai e,
Miten an hmu ve lo.


Hmangaihna rinawm lo hian di karah,
Thinlung a ti hliam si thin a;
Mahse, nang zawng i rinawmna vang hian,
Thinlai a phang ve lo.

Damlai hringnun kawng chhuk chho zawh tur leh,
Lungngaih buaina hmachhawn turin;
Tunah hraileng te chawi ve tawh turin,
I tiam ve tawh em le?

Ka hmangaihna hian ka ngen ta che a
I thinlai pawh tui ang dam se;
Sial ang ka seilenna run chhungah hian,
Kumtluang in par vul rawh.
Continue Reading | comments (1)

Hmangaih Jenny

Phuahtu: Laltanpuia Tochhawng
Satu: Laltanpuia Tochhawng


Chung khuanu ruat reng in i chun leh zua karah,
Duatten i lo seilian, mawiten par ang i vul;
I sakhming kohna an Ngaizual an ti che,
I sakhmelmawi ka tan thlir nin i awm lo.

Mampui, ka duhber che a,
Ka hmangaihber i ni a,
I hmangaihna rinawm i thinlai chhuak ngei chu,
Aw, min hlan ve tawh mai rawh.


Ka chhuang thin che a sin, lengzawng te zingah hian,
Tiang reng a sakhmelmawi khuanu'n a lo duang che;
Aw kan Zoram hi nangnen fang dun ila,
Tichuan kei hian zaiin ka awi zel ang che.

Runhmun kan len dun em loh pawn ka ngen che a,
I kiang a chhemdam thli a lo len vel ni leh;
Chung chhawrthlapui leh tlaitla eng mawi te,
Mawizual a an en hian min dawn ve thin rawh aw.

I tawngkam tha chauh chuan thinlai a hnem zo lo,
I thinlung ngaihtuahna ten min hawi si loh chuan;
Ka dawn lungruk iang hian min dawn ve nila,
Duhten tangah pawmin duhten kan in fawp tur.
Continue Reading | comments (4)

Ka lo haw thuai dawn

Phuahtu: Laltanpuia Tochhawng
Satu: Laltanpuia Tochhawng, H.Lalrempuia

Hmangaihte lenna chu thlir hian a lang silo,
Mahse, engtiang pawhin kan kar lam hla mahse;
Ka thinlung hmangaihna leh ngaihtuahna te chuan,
An chungah thlazar in a awmpui reng thin.

Mampui, kan hrai duhlai te kha an dam thin maw?
Aw, ka va han ngai thin teh lul em;
Mampui, nang tak pawh kha i ngaihawm thin a sin,
Lungphang reng reng suh, aw, ka lo haw thuai dawn.


Aw ka hmangaih te u, ka duat em em te u,
In lawina run riang te, aw, in zalna laikhum
Laitual in lenna te mitthla an a cham reng,
Lungchim ten dawn a har dam phawt mai teh u.

Kan hraite khan ngai hian min au thin awm si a,
Keipawn kawlvalenchham kar dan atang hian in;
Ngai em em hian ka dawn ka dawn thin tawnni tur,
Hmangaihna te kiang ah ngei awm ve thei ila.

Hmangaihte tawng lo hian kumtluang awm dawn ila,
Suihlungleng hian in fam ka van chang hma dawn em;
Aw, lungduh te lenna ah pawh kan ram tan hian,
Tih theih tawk awm ve hian ka va han ring em.


Continue Reading | comments (1)

Min hruai ve ang che

Phuahtu: Laltanpuia Tochhawng
Satu: Laltanpuia Tochhawng

Chhimhlei tualnuam ah sawn vangkhawpui sakhming mawi,
Chawntlangpui leh Sihtlangpui a awm a;
Aw, chutah chuan Pu Hnuna'n dikna in ro a rel a,
Hmangaihna in duat ten a enkawl thin.

Hmangaihna a dai ngai lo, rinawmna a ngai reng, 
Hlimna par ang a vul, 
Aw keipawh chutah chuan;
Hmangaihtu leh hmangaih ka zawng ve a duh a ni.
Ka pu, chu hmun i pan leh (dawn) hun chuanin,

Keipawh min hruai ve ang che.

Aw, Chawntlangpui leh Sihtlangpui lung min len tu,
Chuan ila an vangkhawpui tleitiri;
Suihlung ka rualpui ang a hlimte a laitual lengin,
Hmangaihna tupui ah kan pil dun tur.

Vangkhawpui, sakhmingmawi kumtluang in vul reng rawh,
I chhung a leng lungduh zaleng te;
Hmangaihna in suihlung rual se,
Beiseina leh rinawmna dikna te an thuam mawiber lo ni se.

Aw keipawh chutah chuan;
Hmangaihtu leh hmangaih ka zawng ve a duh a sin.


Continue Reading | comments (2)

Hmangaihna ka ngen a ni

Phuahtu: Laltanpuia Tochhawng
Satu: Laltanpuia Tochhawng

Chhaktiang kawleng zunng zau ah te khian,
Hmangaihna a awm lawm ni?
Chhemdam thlifim leh boruak thiang karah,
Hmangaihna a tel lawm ni?

I thinlung thianghlim tuma la hmangaih,
Ngai lohna ngei khan e;
I hmangaihna lova tlei zo lo te hian,
Hmangaihna ka ngen a ni.


Ka hmangaihna hian a tuam reng che a,
A zuitu chu rinawmna;
Hmangaihna in ka thlir reng che a,
A nghaktu chu beiseina.

Rinawm te hian aw lo awm thin rawh aw,
I rinawm loh chuan maw;
Hmangaih em em che mah ila aw,
Runhmun kan leng dun thei lo'ng.

Aw hmangaihna, hmangaihna aw,
Ka damchhan ber mai kha;
Aw hmangaihna, hmangaihna in,
Hrui ang ka vuan ang che.
Continue Reading | comments (2)

Hmangaihna mittui

18 Apr 2015

Satu: Joseph Zaihmingthanga

Tinkim ka han dawn thin a,
Thinlaiah a thar leh thin;
Nang nen a suihlung rual a lenlai,
Nghilh thei hian ka mawi nemaw.

Aw, khawi ah nge min hnemtu kha,
Ka zawng thin che a lenrual zingah;
Hmangaihna mittui leh pangpar,
I tan rimtui ah ka hlan che kha;
Tunah athlawn mai an chang leh si,
Tuar thiam a har, aw, a na,
Hrilh ka hai ngei e, lunglam ka vai.


Lenrual te chu chhailai di nen,
Hlim ten an leng an nui hiau e;
Min dawnpui lo ka chan khua ruai,
Sulhnu chhuin ka vai leh si.

Khartung sawnin in,
Lawi leh ka nuam i kiangah ngei;
Kan zalna laikhum thlehnem hi,
Mahten ka chul zantlai nemah.

Continue Reading | comments

Chuailo parmawi

Phuahtu: Lalthanzauva (Zodi)
Satu: Lalhlunmawii(Zodi), Zodithangi, Zomuanpuii

Mahten lentupui karah a hawi vel di ngaiin,
Zun zai sa hian in ka au ruai e;
Tuar thiam a har e, tinkim ka dawn in,
Thinlai min hnemtu chuailo parmawi.

Sawithiam a har e, hrilh thiam a har,
Tuar ve tak ang maw kei ka di ve khan..lunglen hi;
I di ngai ve hian em ni lelte i kiu ruai le?
Kar a hla mang e di auh nan zawng;
Ka tuar thiam lul lo, aw, ka ngai em che,
Thinlai min hnemtu chuailo parmawi.

Continue Reading | comments (2)

A va na em

3 Apr 2015

Phuahtu: Paul Liansanga
Satu: Lalmuankimi (Mki)


Kan Lalpa ngei chu hmusitna authawm nen,
An zawh pui e Kalvari lamtluang chu;
Chhantu nei lovin ka Lalpa duhtak chu,
Fam a lo chang a hming luruh hmunah.

A va na em ka Lalpa tuarna chu,
Nun neilo te tan nunna a ni si;
Hmangaih vanga Lalpa thilthlawn pek chu,
Kan thlarau tan nun tawp lo chu a ni.


Sualchhumpui ten bang lovin min hual vel a,
Chapo na ten a hliah ka Lal hmel chu;
Mahse tawngtai thil tihtheihna avang chuan,
A lo lang thin ka Lal hmel duhawm chu.

Sual kawng zawhin lo bawhchhe thin mah ila,
A vul reng si Lalpa hmangaihna chu;
Kan sualna te angin min thungrul silo,
A va mak em Lalpa hmangaihna chu!

Continue Reading | comments

Chung muvanlai

Satu: Albatross, Grace Lalchhanhimi

Tuipuiral rammawi chu ka thlir thin,
Ka lungkham ram ngaiin ka thla a van ruai e;
Rinna thla in va len ka nuam,
Thinlai rilah ngaihni a bang thei lo.

Min thlen la, lung a dam ngei ang,
Ka pan zel dawn khuanu ruat hmun chu;
Ngai chung zela nunhlui hnutiang chhawnin.
Lo leng la, aw! ka chung muvanlai,
Min hruai la, thlawk in thangvansang ah;
Chhingmit chhin zai rello ten ka kuah nang che,
Kawlni eng tur chu thlir in ka bel nang che lungdam ten, chung muvanlai.


Lungduh te nen hlimten lenza ka nuam,
Ka dawn ngam lo lenrual te nen lawmlai ni te;
Mahse, zanmu ka chhing thei lo,
Nunthar ngaiin ka thla a tuihal si.

(refrain)
Lo leng la, aw! ka chung muvanlai,
Min hruai la, thlawk in thangvansang ah;
Chhingmit chhin zai rello ten ka kuah nang che,
Kawlni eng tur chu thlir in ka bel nang che lungdam ten, chung muvanlai.


Continue Reading | comments

All Time Top Chart

 
Copyright © 2008. Mizo Lyrics - All Rights Reserved
Thanks for Your Visit ! Please Come Back!!
BACK TO TOP