15 Nov 2017

Runhmun len i rel ang aw

Satu: Mimi Renthlei & C Sanga

Hmeichhia:
Hmanah khuahmun lenlai in,
Ka hmangaih ber che ti in;
Kumtluang rinawm min tam kha,
Eng vang nge i sut leh ni?

Mipa:
Tiam thu sut ka tum nem le,
Mahse, ka chinlai leng ten;
Kumsul pawh a vei hma in,
Lengdang a chhai an ti che.

Sakhmel tawn loh chhung tawi te hi,
A reilua em ni lungrun;
Ti mai a inthen tur chuan,
Biahthu di kan tiam lo kha.

Hmeichhia:
Hmelma anka leng mai maw,
Lung i her chhan le valmawi;
Kei chuan e kumtluang atan,
Lengdang chhai ka tum nem le

Mipa:
Min ngaidam rawh aw bawihte,
Lengdang chhai ka tum bik nem;
Duhluat vang che'n vala hian,
Lung lem hi ka nei lo e.

Mipa & Hmeichhia:
Tuanna tlang dang rih mahse maw,
Thaikawi bawngte tir ila;
Khuahmun a len leh ni chuan,
Run hmun len i rel ang aw.


0 COMMENT

Post a Comment