Ka bahhnukte

Satu: Omomi Khiangte

In dawn ve thin em lenrualte u lei hringnun hi,
Puan ang kan hnawl zel mai dawn em ni kan ram riangte hi;
Tlawmngaihna leh zonunmawi an liam em ni,
Kei zawng ka phal lo romei iang an ral tur hi.

Harh in tho thuai ang u chhinlung chhuak zofate,
Ram leh hnam humhalh in phei i khai ang u;
Mi u ten raltiang an kai hma ngei hian aw,
Ruihhlo do ila Zoramnuam i siam ang aw.

Eiruk, hlemhlet, duhamna tinreng puan ang hnawlin,
Kan ram rohlu dikna, tlawmngaihna vul tir zelin;
Puanven sawi chhing ila thang leh thar zawng hian,
An sawi thlang sappui nunzia reng kan ngai bil lo'ng.

Kan zam mai dawn em ni chhinlung chhuak zofa leng te,
Hnamdang tawnah hlan kan zuam silo kan ram riangte hi;
Ka bahhnukte khua leh tui ka chan ai chuan,
Hlan mai nang e ka sakruang hi Mizoram tan.