3 Oct 2018

Indo haw lawmna

Phuahtu: Rokunga

Chhak leh thlang, chhim leh hmar zawlah ral a lo lian a;
Vangkhawpui par lai a chul zo ta;
Kan khaw val rual ram mutnaah hmelma do turin,
Chhak, thlang, kawl rawnah an her liam ta,

In sulhnu leh tual in lenna tlang a ngui ruai e,
Hnutiang chhawn ve mai i kan run nuam;
Kan ram riangvai a chan ai chuan ka do ve nan'ng e,
Leido lam thuamah mi lo nghak rawh.

I chun leh zua, rual duhte nen min hrereng fo la,
Zam lovin ral lam chu tawn zel la;
I lo hawn leh hun tur nghakin zalam phei kawnah,
Kan lo hmuak ang che i rual duhten.

"Indona hnehin ka lo kir, kan intawk leh ta;
Aw ka thiam duhtak i lo dam maw?"
"Chung Pathian zaran ka dam e, aw ka thian duh tak,
Hlim takin banah ka vuan ang che."

Tupui raltiang indona leh chhaktiang ram daiah,
Hrehawm hlauhawm zawng i tuar zo ta;
Tunah erawh hlim leh lawmin kan zoram nuamah,
Hlim takin siangah i lawi leh ta.

I fak ang u kan Pathian hi, perhkhuang tingtang nen,
A mi khawngaihna avangin hianin;
Luaithli nul inthen tawh hnute kan intawk leh ta,
Hlim takin zai tin i vawr ang u.

0 COMMENT

Post a Comment