Turnipui leh thal favang lo thleng tur hian

Phuahtu: Laltanpuia/Damhauha

Satu: Lalthansanga Ralte, Zoherliani

Turnipui leh thal favang lo thleng tur hi,
Kei zawng senlai nau ang ka tahna;
Thapui, nang ngai reng renga khua romeiah,
Ka zam na'ng e, i tuanna tlang bawmah.

Aw, i zunngai hian fam mah ila,
Ka luah zo chuang lo'ng che annem te;
I zunleng zamah hian ka uai thlawn e,
Chhimtlangpui chun chawi val ka riang chuang mang e.

Hmanah chuan lungrun hmel a indi tawh hnu,
Karah thenloh biahthu sawi hmain;
A tha valdang duatlaia hrai i chawi chuan,
Kumtluangin Parte, ka tuar nem thei lo vang.

Chungtura ni, chhawrthlapui, siar zawng hian,
Thlangkhuan an dim lo thangvan zawlah;
I lungduh val tawnah zamual liam tur hian,
Engkar in nge puan anga min lo ban le?

Chhaktiangah rihtlang bawm hawilopar iangin,
Chhimtlang van hnuai hril kan vangkhuaah;
Hmartlang khua selin i lo par, ainawni,
A pawi ber chu mi tawnah i hlui tur hi.

Valriang ka tahna vangkhawpui a zau thlawn e,
Min tum lo em mai a na lua e;
Aitenawnpar min phun ka tanglai vuantu;
Tawn loh kar ni chhun a rei awl vawng vawng.

Nichhunah lunglen tinkim han dawn ila,
Ka hmachhuan thinlai chhum ang a zing;
Kei chu riang reng reng ainawn par, nang vangin,
Chan ka nuam, chulthum par zozamah.