Tlaizawng par

Phuahtu: Vankhama

Lal pian hun champha a lo ni a,
Chawrin a lo vul tan leh ta e;
Sik ni eng leh zan dai fim chawmin,
Tuk chhuakin mawi te'n a vul tial e;
Tleitir sakhmel ianga Tlaizawng par,
"Vul mawi," ka ti ang che hminglema'n;
Theih chang se, kumtluangin vul reng la,
An sawi chuailo par ni mai teh la.

Thlir ve u, kan vangkhaw dai a mawi,
A zarah vahkhuai, phengpheleng nen,
Sirva, nungcha par lawrin chhunrawl,
Chawl kai lo ningzu dawn nilen e,
Uai lo te'n vul reng la, chim loh par,
Siamtu chawi reng par i lo ni e;
Sik ni eng thlangtlai a liam chhung hian,
Riah run an lum che'm ni khuavangten?

Vul mawi, i len lai a tawi lua e,
Tan chhawn ang thle nghial virthli lenga'n;
Chung thla puan ang a lo thar ang a,
Vul mawi te uaiin a lo til ang,
I pam em! chul leh uai mai turah,
Tharin kum sulah lo vul leh la;
Aw, engah mawi tin thang zawng pawh,
Chul mai tura Khuanu'n a siam le?