Luah loh di

Phuahtu: Peka (Mapuia)
Satu: Lalngengpuii Tochhawng

Zantlai khaw thiang leh siar eng hnuaiah,
Zanlai thlifim damtea lenlaiin;
Nghilh har di thinlaiah a thar leh e,
Zan mu chhin zai rel a har ngei e.

Hlim lai ni mual liam hnu ngaihlai a thar,
Lawm lai di luah loh di a chang ta si;
Nui hiau a kan chhai lai ni zawngte nen,
Khuarei tawnmang mawl an chang zo ta si.

Sulhnu chhui leh nunhlui ngaih hi maw,
Kei ka chan tawka khuarel lo ni le?
Luah loh zunngaia tah khua sei lua e,
Nunhlui ngaih leh suih lunglen bang si lo.

A rel sual em ni chung Khuanu lengin,
Tuah rem loh tura'n enga'n kan intawn;
Vul lai par ve lo hmangaihna vanduai,
Pialleiah vai ang thamral ta si e.

An sawi pialral then lohna rammawiah,
Mangtha biahthu sawi a awm lo an ti;
Tah chuan then loh biahthu tin hlan ve in,
Leng dun ila luah loh di, aw, nang nen

Damte'n leng la piallei sumtual mawiin,
Duh leng dang tang bela i liam thlengin;
Hmangaih duhsakna nen ka thlir nang che,
Luah loh di, nghilh loh di i chang tawh si.

Hmangaih duhsakna nenka thlir nang che,
Luah loh di, nghilh lo di i chang tawh si.