Suihlunglen hi

Phuahtu: Rohmingthanga (Raw-a)
Satu: Lalneihthangi, R Lalhmangaiha, C Lalzahngoa

Ka dawn thina nunhlui zamual liam hnu,
Suihlung ruala hlim te'n kan lenlaini;
Tunah tawnmang mawl mai an chang zo ta,
Suihlunglenin banni reng a nei dawn lo.

Ka thlir ning thei si lo kan tuanna tlang,
Min ngai lo te'n zamual i liam ta maw?
Engtin nge ka tuar ang suihlunglen hi?
Lunglai di then ka zuam lo, a pawi ber mai.

Min hnem thiam reng awm hian ka ring si lo,
Tapin ka nghak reng che asin, Bawihte;
Nang ngaia fam dairial ka chan hma hian,
Ka di Bawihte, biahthu di min hlan leh rawh.