A Aw B hla

Phuahtu: Ch Pasena

Sikul ka luh tirhin mikhual ang ka ni a,
Ka pawl min siamsakin ka hming an han ziaka;
Mak ti awm fahranin 'A' ka han ti phawt a,
Lungleng awm tak maiin 'AW' ka han ti a.

'B' ka han sa ta a chhawn tur van vei nen,
Ka kawibawm min ti ngai kan tual zawl nuam tak nen;
Ban hma loh phei chuanin 'CH' ka lam ka lam thin,
Ei tak tak si lo vin 'D' hmun ka thleng thin.

phul emaw ka lo ti 'E' a ni awzawng lo,
'F' ka han kai lehin a lo awzia ta zawk;
'G' ka han kai phei chuan vai rim a nam rum rum,
Aieng awm si lo vin 'NG' ka tih tak chu.

Hahchhiau chhuak ang maiin 'H' ka han ti chiam a,
Zungchala kawk zelin 'I' ka han ti chiam a;
Mal rawl teuh ang maiin 'J' ka ti thel thawl mai,
'K' a kal si lo vin thui tak tak ka kal.

Lo zir hmasate kha 'L' ngawt ka tum ta a,
Lum ti awm tak maiin 'M' ka ti em awm a;
'N" lo vin ka zir thin dangnal hunah phei chuan,
'O' ka ti o-o thin vawn ka tum vangin.

'P' ka lam apiangin ka pu pawh ka hre thin,
'R' ka lam erawh chuan kan sumhmun ka hre thin;
'S' ka han thlen hi chuan ka saisik seih seih thin,
'T' ka kai a chinah ka titi ta thin.

Vairal kian hun pawhin 'T' ka ti leh dek thin,
'U' kianga ka awmin ka lo uang em em a;
Khuai lamte pawh zirin 'V' ka ti vang vang thin,
'Z' ka lo thleng ta a ka chhiar zat zat mai.