I din thar leh ang u

Satu: Dzo Tribe

Sik leh sa a lo danglam zel thin,
Avangin, kan Zotlangah pawh;
Khuarel chhiatna tam kan tuar leh thin,
Khuanu'n duhte'n a duan hunbi te chuan,
Hun bik reng an nei tawh mawlh si lo.

Tunah zawng thawnthu maiah an chan tak hi,
Kan fiaratui thiang leh kan tukloh ram nuam zawng zawng te pawh,
Thu tin thiama'n "Par mawi thang vulna,"
Ti a, a lo chawi thin kan ram ngei hi,
I din thar leh ang u, tlawmngai hnam kan ni lo'm ni?

Sik leh sa a lo danglam zel a,
Hri tin reng nen kan leng za ta;
Nunna nei tinreng a hliam zel si,
Khuarel vanduaina zawng zawng te chuan,
Rethei, pachhia reng a thliar tawh si lo.

A tu chu nge maw i nghah zel dawn le?
Nang chauh a nei kan ram riang te hian;
I awmna hmun atang khan hma la la,
Mi thiam zawk te'n an sawi dawn chiangin,
A hre lo fate chu zirtir zawk rawh.