by Phuahtu: H Zairemmawia
Satu: Thangromawia Thomte
Ka rawn fang leh hmana kan vangkhua,
Chhuahtlang liai luai;
A tlang leh mualthuam zawngte kha,
Hleite'n tharin a dang si lo,
Sul ang tumkawng zalam phei tluanah
Tuah vau, ainawn leh hnahnem zawngte'n,
Vul zai an rel, hram thiam aw mawi zawng nen,
Rual hlui leh fam ngaih lunglen a kai tho ve.
Aw, kumsul her liam leh thin te hi,
Theih chang se chelh din ka nuam mang e;
Chutin lungduhte nen vangkhaw zauah,
Tu dang ngai lo vin kan leng za tawh ang.
Aw, khawnge in awm tak,
Ka lenrual lungduh zawng te kha?
An kim lo ve biahzai hlan a,
Suihlung ka rualpui ve tur,
Thuva awmhar iang hnemtu ka vai,
Hril thiam awm maw tawrh har suihlunglen hi,
Auh ruai ka nuam e, relthang dawn lo hian,
Min chhang ve mahna rauthla leng talin.
Nunhlui ngaia tham hi,
Hnemtu reng ka tawng si lo;
Hringnun hnuchhawnin fam mai ka nuam,
Vaihna khuavel ral tawh mai la,
Ka nghakhlel em e tahna ram pel a,
Lalnunnema Salem tuallai len hun,
Tahchuan lungduh zawng kan kim tawh ang,
Awmlai lusun leh fam ngaih a bo tawh ang.
Mahse, ka dem lo ve, ka dem lo ve,
Ka chan tawk tura duan khuarel hi;
Eden hrai hringmi chanvo anchhia hi,
Ka phur, min fan, min zem zawk a lo ni e.
0 comments: