Remna lal chu a piang ta

Phuahtu: Fela (Durtlang)
Satu: Zorema Khiangte

Zan khaw thiang reh takah chuan,
Van mipui chhiar sen loh te'n,
Chanchintha mitin tana lawmna chu,
An puang Chhandamtu pian thu,
Van hla mawi ropui tak chu remin,
"Chhandamtu a lo piang ta!" tiin,
Bethlehema ran in tlawmah chuan,
Remna Lal chu a piang ta.

"Chungnung berah ropui ber se," tiin,
Lei chungah remna thu chu leng rawh se.
Kan tana nau lo piang Van Lal bera chu,
Van Angelte zai puiin lawm hla i rem ve ang.

Chumi zan reh takah chuan,
Chhandamtu a lo piang ta.
Lei lal te'n Amah chu do mah sela,
Van Lal ber a lo ni si.
Kan khawlohna zawng zawng kalpuiin,
Chhandamna famkim a rawn thlen ta,
Sual bawih a tang hringmi zawng zawng tan,
Remna Lal chu a piang ta.

Hruaitu arsi eng mawi chu,
Kan hmahruaitu ni ang che,
Kan kawng atan enna rawn thlen la,
Van Lal pianna min thlen la,
Remna Lal thianghlim ber lo piang chuan,
Kan tan damna kim a rawn thlen ta,
Riangvai leh rethei mangang te tan,
Remna Lal chu a piang ta.