Khawtlang lunglen

Satu: KC Runremsangi

Kumsul vei hian thal khaw romei a lo zam thar leh thin,
Kian zai rel lo ka suihlunglen ti zual tur renga'n maw;
Va zawt siahthing awitu lelte lungrual zain,
Khawtlang lunglen biahthu hrilin zai i vawr dun ang.

Sam ang min then lo, tangah min vuan,
Sakhmel erawh tawn ni a awm si lo;
Hei hi maw an sawi khawtlang lunglen chu,
Phur zo lo hian van rang chhum ang ka thamral pui mai awm e.

Suihlunglen zualin ka thlir vel raltianga lang tlang maw,
A hnim ruai e hmar tiang lenkawl thangvang khuangpui lo ri,
Khuang ruahsur virthlileng tlang tin rawn hrut velin,
Keipawh lunglen biahthu hrilin tlang tin ka chuan e.

Thal favang tlai ni eng no riai ka thlir ning thei dawn lo,
An mawi zual e, raltiang tlang tin tukram chulhnu zawng te,
Tlai tla bang lawm hringfa zawng pawh an hlim ngei e,
Kei ka lunglen khaw zo chhum ang kian zai rel lo ve.

Zaleng te u, min sel lo u, ka tangah lunglen hian,
Min phuar vel e, ka hril thiam lo, lunglam min vaih tir e,
Riakmaw va leng zawng thiang thing zar belin,
Belhlai tawng lo kawrnu iang tah zai ka rel leh thin.