Kan nunhlui

Phuahtu: Asanga
Satu: Asanga Project ft. Fawni Ralte

A herchhuak leh dawn ta maw,
Nang nena kan intawn ni;
Mahse, tawn loh kar rei vang nge,
Suihlung min hersan ta si,
Kha chen suihlungruala hlim tea lengdun thin kha,
Doral iangin maw kan len tak le,
I lung tum zawk em ni lo ni le? A na em e.

Nghilh zai rel zawng a har dawn ngei e,
Aw, nang nen kan hlim lai, lawm lai ni zawng te,
Auh kir rual, koh kir rual chang lo mahse,
Ka tan a hlui thei lo, ka nghilh thei lo ang e aw,
Nang nen kan hlim lai, lawm lai ni zawng te,
Auh kir theih chang mai teh se,
Auh kir ka nuam kum sang atan.

Ka fang nawn leh fo thin e,
Nang nena kan sulhnu te;
A tlang, a mual a dang si lo,
Par mawi duah te'n an vul chiai e,
Min tuar pui, dawn pui ve hian mawi lo mahse,
Suihlunglen min hnem tura,
Hnemtu palai ka tana ruatah chhal mai nang e.

Mahse, chan tawk Khuanu'n a rel ang hian,
Lungdam te'n pawm thiam zir zel ila;
A rel sual lo'ng, a ruat sual hlei lo'ng e,
Beiseina nen hmatiang hun chu ka thlir zawk nang e.