Khampat bungpui

Satu: Lalhlunmawii (Zodi) & LC Sangi

Hmanah kan pipu te'n thlang an lo tlak dawn hian,
Phun bungpui an phuna, hrilhlawk thurochhiah nan,
Phun bung zarin lei a thlen hunin,
Lam ang letin he kawlah hian
Vangkhua kan din leh ang an ti.

Chutin, hun a kal zel thangthar tam ral hnuin,
An hrilhlawk ang ngeiin tunah a lo thleng ta;
Phun bung zarin lei a lo dek a, tin, keinin vangkhua kan din ta,
Khampat bungpui hmunah hianin.

Ramdang mi kan ni lo, kan ram ngei a lo ni,
Chhingkhual mi kan ni lo, kan vangkhua ngei a ni,
Kan pi, kan pu te'n kulhbing chhungah,
Chawltui ningzu an dawnna kha,
Kan rawn dinthar leh a lo ni.

Chutin a sakhmingah 'Zoram thar' kan lo chawi,
Khua zawng laia khaw nuam, ram zawng laia ram nuam,
Vang khawpui dang reng hi kan ngai lo,
A duh apiang lo kal ve u, Khampat bungpui hmunah hianin.

Chung Pathian Van Lalin a ruat reng a lo ni,
Kan hnam dinchhuahna tur, a ram lo zauna tur,
Malsawmna tinrengin a vura, a par chu kenin kan tlan ta,
Khampat bungpui hmunah hianin.