Kumtluang atan

Phuahtu: Rodingliana

Satu: Rodingliana

Ka chan tawk khuarel hi kei zawng,
Suihlung dam te'n tuar a har ka ti;
Thalengi zun ngai reng reng hianin,
Hlim te'n chhun ni ka vui zo lo.

Eng kan ti nge, Khuanu leng hian,
Kumtluanga leng hmun tur hian,
Min duang ve lo em ni, bawihte,
Ka ring phal lo thamral mai tura'n,
Kimte'n kan tiam thu di zawng te.

Ka hril thiam ta e kan nun,
"Kumtluang atan," tia nang nen;
Dawvankaia kan tiam zawng te pawh,
A thlawn mai an chan tak hi.

Khuanu samsuih loh zawng, bawihte,
Kumtluanga leng hmun tur zawngin,
A duang ngai lo an ti asin;
Hringmileng tum dan mai mai hi zawng,
Kumhlun tur reng a awm si lo.

Chuti'n bawihte, leng dang tawna'n,
Kumtluang atan i hun hmang la,
Fanau mal chawiin dam reng la,
Kei paw'n Khuanu samsuih di kianga'n,
Hlim te'n chhun ni ka vui ta'ng e.

Sakhmela'n zawng e, lungrun,
I tling zo ngei mai lungdam nan,
Par ze tial tin aiin i mawi a,
Ka tan i hlu ro sum ai paw'n.

Mahse, enchimloh di, ngai teh,
Khuanu rorel dan zawkah chuan,
Nangin leng dang tang bel tur leh,
Kumtluang atana leng hmun lo tur hian,
Min lo duang zawk a lo ni e.

Indem lo'ng aw, keini hi zawng,
Lungloh thuah la bik lo la;
Kan karah thu lo tawp tawh se,
Kumtluang atan lo tawp tawh se,
Khuanu rem loh i kiang belh chu.