Vanah Krismas

Satu:  Vanlalawmpuii (Opi)

December a lo thleng, leng zawng an hlim ngei,

Veng tin, kawn tin chawih te'n an eng leh ta;

Rawng hrang mawi zawng te'n par an chhuang leh ta,

I awm ve tawh si lo maw, ti hian ka dawn.

Van hmun nuamah engtin Krismas hmang ve maw?

Daifim lengin run nuam khuh ve maw?

Angel nen 'zan thiang reh' rem ve cheu maw?

Fam te'n vanah engtin Krismas hmang ve maw?

Kawnchei mawi te fang velin, i sulhnu ka chhui,

An mawi dan a dang, aw, ka thinlung hian,

A zawng ruai thin che run in sumtualah,

Suangruah ramah kal tiin, ti hian ka dawn.

Berampu te nen nausen duhawm chu, chibai bukin a tang in bel em?

Zan thianghlim ropui tak hmang ve cheu maw?

Fam te'n vanah Krismas engtin hmang ve maw?

Van hmun nuamah engtin Krismas hmang ve maw?

Daifim lengin run nuam khuh ve maw?

Angel nen 'Zan thiang reh' rem ve cheu maw?

Fam te'n vanah engtin Krismas hmang ve maw?