Vanglai hringnun

Phuahtu: Ngurthangvela

Satu: David Darlong

Suihlunglen changin tlang tin mual tin ka chuan,

Lunglen, aw, a zual mang e;

Hmana nun hlui mual liam hnu min ngaihtir e,

Vanglai nun liam hnu tawn ni awm tawh ngai lo,

Ngaiin au mah ila, nun hlui ngaih lunglen, 

Aw, a thar zel si thin.

Kohkir rual awm tawh si lo, hmana nun hlui mual liam hnu,

Vanglai nun ngai lo reng an awm lo ve;

Hringnun khuarel lo ni e,

Kan vanglai hlim ni zawng hi,

Amte'n i hmang tha ang u, aw, kan hringnun.

Siar Chawngmawi Hrangchhuan chhawrthlapui lo eng e,

Aw, ka thlir ning thei lo ve;

Lenrual duhte nen hlim zai vawr zan te kha,

Vanglaini chena duhthu tinkim kan sam,

Kan hlim lai zante kha,

Aw, ka ngai zual thin, zai kan vawr ho zante kha.

Lenrual lungduhte thlafam chang tawh zawngte kha,

Aw, ka ngai zual thin mang e;

Ngaih a na, lunglen a zual tawn ni awm lo,

Fam rihsang an liam hawilo par mawi tawnin,

Pialral ram mawi nuamah khian,

Hringnun ram ngai lo reng hian,

Rauthla van sang an leng.

Pialral ram mawi nuamah khian,

Lungduh kan then zawngte kha,

Hnutiang chhawn ram hi an ngai tawh lo ve,

Hringmi nun ngai lo reng hian,

Nun thing par tlana lengin,

He khawvel ram hi an hawi tawh ngai lo.