28 Jan 2018

Jehova Rafa

Phuahtu: PC Lalrokima
Satu: North Mizoram District PYD Choir


Damna Isu, I hnen ka rawn pan e,
Ka lei hlimnate leh lawmnate vuiliam in;
Babulon silhfen hlip vekin ka lo kal e,
Nangmah chauh a ni ka tuihna chu a awm,
Sual vang a hliam taksa leh thlarau rethei tak
Nangmah chauh damna kim a awm Isu.

Damna, damna, Isua, aw, ka thlarau damna chu,
Ka thla hliamhnu damna chu nangmahah a awm si;
Isu, ka thlarau hlimna chu i ni,
Isua ka damna, "Jehova Rafa" ka damna.


Rethei, pachhia, saruak ni mah ila,
Mangang, beidawng, lungngaiin ka rum ngai tawh lo'ng;
Damna kim Isua ka tan a awm tih ka hria,
Ka kulhbingsang a ni, ka rinchhan ber a ni,
Ka lei taksa hian hrehawm tuarin chau mahse,
Damna kim Isua ka nei ka lungawi e.

Khawvel mawina, hlimna a chuai leh thin,
A par vul lai nite a tawi lua hringnun hi;
Hlun tur an awm lo, cham hlen tur an awm lo,
Sanna leh hmingthanna, rosum zawng zawngte hi,
Kumhlun tur reng an ni lo an ral leh mai dawn,
Ka damna Isua erawh chatuan atan.

0 COMMENT

Post a Comment