Thihna luipui

Phuahtu: T Romama
Satu: Vengthlang Pastor Bial Zaipawl, Lunglei District PYD Choir (2005), Sialsuk Kohhran Zaipawl

Damlai nite hi kawlah an herliam thin,
Tah leh buaina ten nitin min nang vela;
Lal remruat a ni tuman kan hnial thei lo,
Pathian anchhedawng hringfate kan lo ni e.

Aw, thihna luipui kan daikai hma chuan,
(He buaina) Ram khawharah hian luaithli kan nul thin;
Vansang run nuamah kan chawlh hunah chuan,
Thihna tura anchhia reng a kiang tawh ang.

Vanram panna kawng zim kan zawh mek lai hian,
Hringfa tana vawi khat thih a tul si maw;
Krista nena thihna luipui kan loh chu,
Hlauhawm ber a ni, rapthlak ber a lo ni e.

Thihna thlan pawhin a hneh loh Lal Isua,
Thihna hneha tho lehin a nung reng ang;
Zanthim a rala khua a lo var hun chuan,
Hnehtu Lal Isua zarah ka hlim dawn si a.

Nunna, chakna leh hun leh kum ral mahse,
Vanah in ka nei ropuina zam velah;
Lungduh kal hmasate nen kan len hun tur,
Thihna luikam atang hian ka thlir bang thei lo.