Nunpui

Satu: Lalngengpuii Tochhawng

Mahriak awm khawhar changin,
Ka dawn thin sakhmelthai;
Tawn leh ni her si lo maw,
Lenna tlang a dang ta si,
Chutin ka dawn, ka dawn thin,
Ka nunhlui lungrual lenlai nite,
Han dawn ve thin tak che maw, Nunpui.

Kha leh chen sul ang zui a,
Lenna zawlkhawpuimawia;
Suihlung rual a len lai kha,
Zawlkhawpui lanu leng zingah ,
An awm lo nang chhing zo tur,
A ngur nun ka iang lo a pawi ber mai,
Chutin i tan ka tling zo lo maw.

A ngur nun iang lo vang mai maw,
A riangfa thinlai na hi;
Engvang kher nge maw ka tawn che,
Aw, luah loh tur di nuimawi,
Hei hi maw an sawi phuloh di zuna uai chu.

Ka hlan lo che biahthu di,
Ka thinlung luahtu ber;
Zaleng zingah ka thlang che,
Mahse maw rairah riang val hian,
Biahthu hlan che ka zuam lo,
Mahse, Nunpui, i parmawi leng dang tawnah,
A uai mai tur ka dawn ngam si lo.

Mahriak awm khawhar changin,
Ka dawn thin sakhmelthai;
Tawn leh ni her si lo maw,
Lenna tlang a dang ta si,
Chutin ka dawn, ka dawn thin,
Ka nunhlui lungrual lenlai nite,
Han dawn ve thin tak che maw, Nunpui.