Ka hrai duhlaite

Phuahtu: C Lalzarmawia
Satu: Lalropuii Pachuau, K Lalthlamuankimi

Ka lunglawmnan leh duhaisamin nuthai ka chang ve a,
Karah hrai nen hlimte'n lenlaiin ka tan vanpui lo chim;
Zuapa'n a thai leh hraichawi aiin chawlhtui ningzu bel e,
Ka tan hringnun parvul ve chu e, tliakin lo vuai zo e.

Thinlai ana tuar a har ngei e, zua tel lo chun ianga,
Mahte'n ka hrai bungdawntuai karah chham ang ka lo zal e;
Nunkhua har chuang a lenlaiin lunglai lo mawl zo e,
Chhimthli ianga dan zawh rual lohin hrai thenni herchhuak e.

Chawi loh hrai ngaia chhunni hmangin zankhua sei thin ngei e,
Ka hmangaihna lantir ve turin kan kar a dang ta si;
Kir leh thei hian ka mawi si lo maw chhungkima leng turin,
Chun chawi loh nau ang leng tur chuan, aw, ka phal thei mawlh si lo.

Ka hrai dawntuai ka duhlai te u, hei hi lo ngai teh u,
Kumpui tam pawh liamin vei mahse nghilh thei reng in mawi lo;
Zuapa, nuthai in chan thlengin min han hrereng ula,
Thaitlinglo chun hmangaihna hi, aw, nghilh lul lo ang che u.

In hmangaihna awka mawi tak te thinlaiah a thar leh thin,
In kimtlang mawi leh phei lai khai zia mitthlaah a cham reng e;
Tawnmang lamah hlimte'n lengin nau ang kan nui za a,
Mahse, zingtiang bawhar zai lo sa, hai ang thang leh si thin.

Khuavel tan chuan eng ka ni nem le, hnungchhawn hnu mai ka ni,
Mahse, misual ngaidam thin tu chuan ka banah min kai e;
Hmangaih tlak loh hmangaihtu min pe thinlung thlamuanna nen,
Ka sualna te min ngaidamtu chuan min ensan ngai lo e.

Ka hrai duh lai enchim loh te u, kumpui tam vei mahse,
In tan tling lo chunnu hmangaihna dai thei rual a ni lo;
Ka hniak hnung chhui ve tur atan chuan ka phal lul lo che u,
Khuanu ka dil intan bang lo in, ka hrai duhlaite u.

.