I ram lo thleng rawh se

Phuahtu: T Zonunsanga
Satu: Serkawn Pastor Bial Zaipawl (2017-2019)

Leimi zingah i ram lo thleng se,
Khawvel zawngah hian lo thleng se;
Van chungsangah ni leh thla leh arsi nen,
Hmun tinreng hi luahkhat se,
I ram ropui tak thleng zel se.

I ram ropui lo thleng rawh se,
I duh zawng vana an tih angin;
Leia mite'n ti zel rawh se,
Lalpa tlang thianghlim nuamah chuan,
Chinghnia leh beram an tla dun,
Sakeibaknei chuan bawngpa angin,
Buhpawl a ei ve tawh ang,
Lalpa tlang thianghlim nuamah chuan,
An ti na in, an ti chhe tawh lo ang.

Mimal nunah i ram lo thleng se,
Lei chhungkaw tinah lo thleng se;
Kohhran hoah i ram ropui lo thleng se,
Hnam tinrengah lo thleng se,
Leilung zawng zawng hi luahkhat se.

Rorelnaah i ram lo thleng se,
He Zoram dung leh vangah hian;
Zofateah i ram ropui lo thleng se,
Rinawmna leh dikna in,
He ram hi luahkhat vek rawh se.

Thil siam zawngte'n i ram lo thlen hun,
Beiseina in nen an thlir reng e;
Pathian fate zalenna ni lo thleng tur,
Nghakhlelin an thlir reng e,
Rum, nauvei, natuarin an awm.