Satu: R Kawlthanmawii
I tan ka tling lo tih ka hria e, Lalpa,
Ka sualna vangin ka lungngai thin a;
Hmangaihtu ka ngai, nang ka ngaiber che,
Lalpa, min siamthar leh rawh.
Nun chau, beidawngin, lungngai khawharin ka rum thin,
Chhantu, hnemtu ka ngaizual thin;
Bopilna hlauhawm karah ka ding reng,
Lalpa, min siamthar leh rawh.
I hmangaihna tel lo chuanin e, Lalpa,
Ka nun hi engmah lo mai a ni;
Saruak leh bawlhhlawh hman tlak loh a ni,
Lalpa, min siamthar leh rawh.
I chakna, theihna ka ngaizual thin, Lalpa,
Sualna khurpuiah ka din reng lai hian;
Suala ka bopil hi phal suh la,
Lalpa, min siamthar leh rawh.
I tan ka rinawm lo tih ka hria e, Lalpa,
Mahse, nangmah chauh ka thlang nawn leh che;
I ropuina, mawina puang leh turin,
Lalpa, min siamthar leh rawh.
0 comments: