Lalpa mi hriat

Phuahtu: Tluanga Buhril
Thluk siamtu: El-Bethela
Satu: Stacy Punte

Khawvel mite hriat ni lo mah ila,
Chhandamtu min hriatna hi ka tan a tawk;
Khawvel hausakna ai in ka thlang zawk,
Hmangaihtu Krista ngei chu ka tan a tawk.

Mahni ta pawh in ni tawh lo va,
Thisena lei in ni tawh zawk asin;
Khawvelin min hre lo mahsela,
Ka Lalpa mi hriat leh a chhinchhiah ka ni.

Khawvel parmawina te hi a chuai thin,
Lal Krista erawh nitin a mawi zual zel;
Ka lungngaihniah pawh min awmpuiin,
Thlamuan lawmna min chantir a va hlu em.

Channaah Lalhmel a lo lang thina,
Tuarnaah pawh hmangaihna a lang thin a;
Taksa lam thihnaah Lalhmel a dam,
Chu kawng chu Lalpa min hruaina a ni si.

Aw Lalpa, ka khawvel mit tidel la,
Nangma lam ka en reng fo theihna turin;
I hriatloh reng a awm lo ka nun hi,
Hriatchian leh zual che hi, aw, ka va duh em.