Siamtu Pathian tan

Phuahtu: P.S Chawngthu
Satu: Mizo Community Canada (MCC)

Thangvan sang chung siar leh chhawrthla, turnipui eng,
Chhemdam thlifim leh khuangruah sur;
Siahthing hring hnahnem par mawi, luikawr suanglungpui nen,
I hming mawi nan an lo ni e.

Engah nge hringmi leng hi thilsiam chungah lengin,
Mal tin sawm sakna par tawnin;
I kutchhuak sulhnu para lal lai nuam tin chenin,
Duhte'n i lo siam ni ang le?

An theih tawk te chhuah zelin Siamtu sakhming mawi nan,
Thil siam tinrengin an than tir;
Khuanuleng suihlung remin awm dan an thiam ngei e,
An vul zel dawn e, Siamtu tan.

Mi zawng hian hre ve thiam se, Siamtu sakhming ropui,
Lawmin fak zai rem kan awm e;
Mahse, Pa tilunghnurtu, thinlai tina renga'n,
Kan piang keini hringfaleng hi.