Phuahtu: Tintin Lalmuankima
Satu: Lalthansangi
Ram tha leh zual thlen hlan ka nghakhlel e,
Lalpa'n ka tan a buatsaih ram nuam khi;
Chu khawpui angel varte lenna ramah,
Lei lungngaih, tahna ram reng kan ngai lo'ng.
Tlansate an leng e, chu ram mawiah,
Beramno en vel khawpui mawiah chuan;
Lungngaihna te'n thla an zar tawh lo,
Van hla mawi remin, awi maw, an fawn dim e.
He ka hringnun thlaler zinkawngah hian,
Lungngaih, beidawnna ten thla an zar e;
Tapin kan rum thin Lalpa, i ram ngai hian,
Zion khawvar hun kan nghakhlel e.
Damna Isu nunnem, kan ngai em che,
I ram ropui Zion ram mawiah chuan;
Hrehawm leh lungngaih chhumpui a kiang tawh ang,
Hlim zai vawrin lawm a kim tawh ang.
Tui leh thlaraua apiang thuthlung fate,
He leiah hrehawm tuar thin mah ila;
Kan thleng ve ngei ang thuthlung thianghlim vangin,
Chawlhna ram Zion khawpui mawi chu.
0 comments: