An bo bil lo'ng e

Satu: H Lalchawimawii

Bawihte, biahthu di kan tiam lai khan,
Lem ang maw min lo der;
Ti ema riang tur reng hianin maw,
Sam ang min lo then le!

Mahse, min dawn bil lo la,
Suihlung ka phang nem maw;
Chantawk leng zawng an bo bil lo'ng e,
Van hnuai he lei chinah.

Ka dawn lungruk duhaisam changin,
Ka thlang thin che, Thapui;
Mahse duhlai, ka tan chuan e,
Tah khua a sei mai thlawn.

A tha leng dang chu der zel mah la,
I lung an dum lo'ng che;
Khuavel zaleng zawng chhiar chhuak mah la,
I tawng lo'ng duhaisam.