Phuahtu: Lalrinthanga
Thluk siamtu: Remsiamliana
Satu: H Lalchawimawii, H Vanlalhlana
A sakhmel ka hriat ngai loh ka tan tawrh har di,
Hun rei lo tean kan in tawng a;
Biahthu hlan hman lo te'n zamual i liam ta si,
Auh ruai ruai mai ka lo nuam thin che.
Ka ngai em che, luah loh di hmeltha,
Sakhmel lawm ni a rei lo em;
Kar a hla e, di te,
Biathu di engtin nge ka hlan dawn che?
Aw ka di, ka ngaih lai ka lawmna ber mi u,
Uai lo te'n kumtluangin ka tan hian;
Han vul teh mai la kan run mawia'n,
Ka lei lawm zawng a kim ve ngei ang.
I sakhmel tawn leh ni tur ka dawn chang ni hian,
Ka lunglai mawl zawng a hlim thin e;
I sakhmel mawi chhingmitthlaa'n a cham reng si,
Ka ngai em che luah loh di hmeltha.
Aw ka di, lungphang lo la, ka duhlai valmawi,
Tuanna tlang te chu dang rih mahse;
Ka vawng zel ang i tan rinawmna,
Ka ngai em che luah loh di hmeltha.
0 comments: