Pension hla

Phuahtu: Lalnunvula, MSS
Thluk siamtu: Richard V.L Zara
Satu: Bethlehem Vengthlang Branch YMA Zaipawl

Khuanu malsawmin mipa vannei Buimeitawia iang a,
Sawrkar ropui pisa run nuam kai vein,
Kawla ni chhuak chhiara pisa lamtluang zawh laiin,
Rel thiam sawrkar service dan ropui chuan,
Lawm tak chungin service lai min thlah liam ta.

Ni e, ka lungngai lo, sawrkar thatna zara'n,
Chhuanchham mai tura liam tir phal lo vin;
Phu loh rosum hlu amten min hlan,
Cho zawh rual runpui rem ve nan,
Ka tan kawl a lo eng ve ta.

Ka hril zel dawn e, sawrkar pisa run nuam kai zawng zawngten,
Hei hi chiangten in thinlung phekah ziak r'u;
An sawifak pension rosum hlu dawng ve thei tur hian,
Sel kai lo awm dan tha a tel lo chuan,
Bei ti dawng, lung ti ngai thlawn mai lo ni e.

Amah chung Pathian ropuiin a duhloh sira a hnawl,
Eiruk, hlemhlet, nunphung tha lo zawngte hi;
Service danin puan ang a hnawl chi tho lo ni e,
Relthang phur chung sira hnawl nih ai chuan,
Rinawmin sawrkar thu awih zel mai nang e.

Kei zawng ka lungngai lo, ka thawh thatna zara'n,
Chhuanchham mai tura liam tir phal lo vin,
Phu loh rosum hlu amten min hlan,
Cho zawh rual runpui rem ve nan,
Ka tan kawl a lo eng ve ta.

Aw unau, i lairilah hei hi lo dawn ve thin che maw,
Tluangten rihsang mual liam lo va dam te a;
Khuanu malsawma service laia pension thei tur a,
Nunna hlu chelh din saka i awm hi,
Lalpa zara vannei pual bik lo ni e.

Aw le, ka lungngai lo, sawrkar thatna zara'n,
Chhuanchham mai tura liam tir phal lo vin,
Phu loh rosum hlu amten min hlan,
Cho zawh rual runpui rem ve nan,
Ka tan kawl a lo eng ve ta.