Lalpa a kan rochan hlu ber

Phuahtu: Zothangkima
Satu: Zoramchhani

Lalpa a kan rochan hlu ber,
Kan hrai duat lai Zamte;
Awmlai nunrawngin a lo man tak che hi,
Anka nem ri reng i chhuah tawh si lo,
I par mawi chul tur kan phal lul lo a ni.

Hriatthiam a har, Lal remruat hi,
Damna runpui belin kan tlan vel a;
I chun leh zua te'n theihna reng kan nei lo,
Damna famkim i chan tur chu thlirin,
Chung Pathian hnenah, Zamzam, kan hlan tawh che.

I lenrual te tawh chang ni hian,
Kan hrilh a hai zual e,
I sul i hnu leh i zalna laikhum nen,
I hlimthla lengah i sakhmelmawi leh,
Thinlai ti riangtu an lo chang zo ta e.

Lei hrehawm hi hnutiang chhawnin,
Lung muangin chawl tawh rawh;
Zion Lal nunnema hnen i thleng tawh si,
Damna famkim changin lo zai tawh la,
Khawpui thar nuamah min lo hmuak ang che aw.

Khuareiin min hnem tak ang maw,
Tah kin ni awm tak maw?
Ka nghakhlel em e, aw, khawpui thar nuam chu,
Tah leh lungngaih reng a awm tawh lo vang,
Zion khawpui thar kan thlen ve hunah chuan.