Khawtlang lunglen (Vankhama)

Phuahtu: Vankhama

A min suihlunglen an hril chang niin,
"Di zunah chhawl ang hian ka uai" an ti;
Ka suihlunglen ve chang hian dawn ila,
Chin lem a nei lo khawtlang mai lo hian.

Hei hi maw an sawi khawtlang lunglen chu,
Lungmawl tuara'n lairil a fan ve e;
Khuasan sikni sen van zawl a lo kai,
Pengleng len thiam ten vau dung an rawn thual,
Fanglawr an liam a sumtual lo dai,
Hrairual pipu leng zai sa e daikawmah,
Chun herawt pau, tui lawm ar inchhawn e,
Val lungleng chang hnah lo kiu chhuahtlangah,
Tukkhum vilik hlim te'n zamual an liam leh,
Dawngral kiu vaiva awmkhua har em e.

A lang saw tlang hmanah, furkhaw thiangah,
Hliap romeiin tunah thlirna min dan;
Va fang ila chhuahtlang dai lungrawn lam,
Thangrei nihawi uai te'n an lo nghak e,
Tin huap ram tlangsam a par vul chungah,
Nunnem nipui zamin a kai chiai e.