Tlaitla eng

Phuahtu: Dokamlova (D.K-a)

Ka han thlir a saw raltiang, tlaitla eng no ruai saw,
Tlang tin mual tin a mawi tlaita eng sawn;
Min ngaihtir nunhlui liam hnu,
Suihlung mu hnu a kai tho ve,
Eng dang dawn lo panlai hringnun zawng kha.

Aw, lung min len ka thlir ning lo tlai tla eng saw,
Min hriatchhuah tir nunhlui,
Tuanna tlang dang rualhlui te;
Auh kir rual loh nunhlui an chang zo ta,
Aw, zan thimin a nang mek saw,
Ka ngai ngam lo, ka phal lul lo.

Thlir ve u, a en mawina, lung tilengtu nen sawn,
Zan thim lungngaihthlakin a bawm mek e,
A liampui mek thimnain, mual a liam thlang lenkawlah,
Tlang tin mual tin zawng pawh a ngui ruai e.

Thal khaw romei lo zam e,
Tlang tin mual tin mawiin;
Suihlunglen tizual mai an chang leh thin,
Nunhlui ngaih tizualtu mai,
An chang leh thin hringmi leng tan,
A eng mawiah nunhlui ngai lo awm maw?

Mahse, Khuanu ruat lo ni,
Hringfa leng tan malsawmna;
Siamtu kut chhuak reng hi a mawi mang e,
Fur khawthiang, thal romei zam;
Vang ni eng tlaitla eng mawi,
Hringfaleng tan siamtu ruat reng lo ni.