Khawngai hnuchham

Phuahtu: Vankhama

Satu: Vanhlupuii & Vanlalruati, Territorial Songster IET ft K Lalringnungi

Zawl khawlai vawng Dawrpui thang Bungkawn sira'n,

Hnam tin leng khuai ang lawina tluang hrula'n;

Thinlai tihnim bil renga an run in lai chhung,

Sakhming kha 'Hnuchham rairah run' an ti,

Tahchuan an fuan e, chun tawng lo rairah riang chuang,

Chun chawi loh renga piang riang hleihluante,

Tanpui ngaiin tunah tlai nilen zankhua nen,

An rum, khawngaihtu chun lem tang an bel.

Awmlai lung lian kha chu hrang ta lo se la,

Duhte'n a chun ngei khan a tang laiah;

Awi maw! A zalsan ta piallei thuah riat karah,

Hrai chawi aw-rawl a thleng pha zo ta lo,

Laihang e, chun rih sang mual liam hnu a au ve,

Hnun um dar dawi leng chawiin, "Hei, bawihte",

Zan chhing lo mittui nen lainat tlawm mak chunnu'n,

Riang hluana naunawnte a sep mu thin.

Chhimhlei pialah mim ang kan piang ve na a,

Kar a hla lian chhung leh rairah kan nun;

Cho loh awmlai lengin ka chun kai lo se aw,

A tang vuanin chawnban ka vawr ve tur,

Tunah ka zal, sakruanga'n laitha a zam lo,

Theih chang se, mual liam hnu ka chun ngei khan,

Kirtiang relin tangah pawmin awihlai riangte,

Hnun tui tulhin min chawi ma bil lo'ng e.

Chun dang chun dang lem an awm thei ta chuang lo,

Nang leh kei hi an chun leh zua kan ni;

Phal tawk hlana dawi ang kan dawm ve theih chuan le,

An tan rohlu leh chawitu chun kan ni,

Van pui kan khum a hnekin pi leh pute u,

Min ruat e Siamtu'n an khawngaihtu turin,

Hai bil lul lo ula khawngai hnuchham riang hmun,

Kan ba e, sial ang an tuai lenna tur.