Lawmthu ka hrilh a che

Phuahtu: Julie Hmingthantluangi

Satu: Lalduhsaki

Ka pindan chhungrilah i hmaa ṭhingṭhia ka lo kùn hian Lalpa,

Ka ṭawngṭaina tlâwm tak hi min lo ngaihthlak sak leh ang che;

Kei mi sual nung tlak lo, hremhmun hmabak mai hi,

I thisen hlua min tlan avangin lawmthu ka hrilh a che.

Min chhandam nan KRAWS,

I thiltihtheihzia lantir nan THLAN RUAK,

I malsawmna famkim CHATUAN NUNNA;

I takzia entir turin i KOHHRANHO,

Ka nun kaihruai turin i BIBLE THIANGHLIM,

Min pek avangin lawmthu ka hrilh a che.

Keimah ka inen hian ka tlin lohnate ka hre chhuak leh fo ṭhin a,

Mite felzia ka ngaihtuah chang phei chuan keimah ka insit leh ṭhin a;

Kei mi tlaktlai lo ber mai leh chhuan tur réng nei lo hi,

I chhandamna min chantir avangin lawmthu ka hrilh a che.

Lal Isua nun ze mawi tlâwmna nun ang kha pu thei turin min pui la,

Nun belhchian dáwl nei turin min zirtirin min pui ang che;

Miten ka nun an ena nangmah neih châkna hial,

An neih chuan chu chu ka lawmna ber tur a lo ni ang, aw Isu.