Nang chauh ka innghahna

Phuahtu: David Lalremruata Chawngthu

Satu: BCM Lawngtlai East Pastor Bial Zaipawl (2023 - 2025)

Nunkawng dik zawngin ka hringnun hi,

Kal ngaihna hre lo vin a buai thin a;

Khawngaihna a khat ka Lalpa chuan,

Min ngaidamin chatuan nun min pe ta.

Aw Lalpa, tlinna reng ka nei lo,

I hmaah hian chhuan tur reng a awm lo;

Chak lohnain nitinin min tuam mah se,

I chakna rinchhanin ka pen zel ang.

Aw Lalpa, nang chauh ka innghahna,

Ka innghahna leh ka kulhpui nghet i ni;

Min kai la, aw, min kalsan suh ang che,

I hnenah chauh muanna kim ka hmu si.

Lei hringnun harsatnaten min chim,

Thlemna thlipuiin min tibuai fo thin;

Nun hlimna pawh a kiam leh mai thin a,

Chauvin ka rum, ka ngai che Lal Isu.

Hmangaihtu'n ka tawngtaina a hria,

Min kalsan lo, ka pilbo a phal lo;

Hmangaih banin min lo kuangkuah a,

Chakna tharin ka nun min thuam leh thin.

Aw Lalpa, nitin i hnungzui a,

Harsatna karah Kraws pu zel turin;

Min pui ang che, chhel leh huai taka,

Thih thlenga rinawma nung zel turin.

Aw thlarau thianghlim, lo leng ang che,

I tel lo chuan kal ngaihna a awm lo;

Hmangaihnaa rawngbawl zel turin,

I duh angin min khawih nawn leh ang che.

Lei hringnun a ral hunin,

Lal duhawm kan hmu ang a; 

Lawm takin, aw, a kiangah chuan,

Chatuanin hlimin kan leng tawh ang.