Ka ngai em che

Satu: Lalthansanga Ralte

Tawnmang em ni kan nun a dang zo ta,

Rairah riang run in chhung a chang zo ta;

Belh lai zuapa, khawiah nge i awm?

Suihlung a leng em mai, aw, a leng vawng vawng.

Khua lo tlai a, lunglen a zual leh thin,

Lamsul an lo hawng, aw, ka tawng lo che;

I tel lo a damchhung kan hmang tur hi,

Zan mu chhin zai reng hi, aw, ka rel thei lo.

Kan ngai em che, i thai leh hraichawiten,

I u leh nau, i then leh rual zawngten;

Thinlaiah nghilh ni reng kan nei lo'ng che kumtluangin.

Kawl lo eng a lunglen a zual leh thin,

Tlang tin leh mual tinte ka han thlir a;

Ar ang kan vaih khua reng a sei tur hi,

I tel lo chuan damchhung kan hmang zuam lul love.

Fam rolung mual chham ang i zalna,

Tuangtuah vul mawiah tal lo to la;

I par tlan sirva nen lungrual zain,

Kan bel nang e, i hliap hlim chhun nitin.

Fam i chan nan sarah kher maw lo ni,

Sa hrang thlunglu ianga run i lawi hi;

Kan tuar thiam lo i unau zawngten,

Kan ngai ngai bang dawn lo, kan ngai bang dawn lo che.

Thih lungngaihnaten min tuam mahse,

Chhuahsanin Chhandamtun min hruai ang a;

Min lo hmuak ang angel varte nen,

Chatuan ram mawiah khian kan intawk khawm leh ang.