Kar a hla parte

Phuahtu: Laltanpuia (Sialsuk)

Satu: Tlanglawma Ralte, Awmhar Champion (Sialsuk), Zoherliani

Kar a hla, Parte, ngaih lai i zual leh thin,

Ngai lo ang hian thlang tlai zamual ka liam ta'ng e;

Aw, ka lungdi par ang lawm leh ni awm tak ang maw?

Ti hian ka dawn, awmkhawhar suihlung a leng em mai.

Aw, kumtluang hrui ang sei mah sela,

Khiang min awih san lo vang che;

I sakhmel leh biahthu thinlaia cham reng hi,

Kumsul vei se par ang hian, bawihte, ka lawm leh ang.

Rial a rum, Parte, ka chung khua lo ri,

Ka ngai zual thin, nun hlui zamualpui liam tawh hnu;

Di inthen hnu siar mah lungrualte'n an leng hmun,

Tawh leh nan kar a hla, ka thinlai a dam thei lo.

Zan khua alo tlai bawharin mi tho thin,

Kei chu run hmun lo va zal lai ka rel ta'ng e,

Kar a hla tawnmang mawlah suihlung rual mah ila,

Tah nan zun leng a chang thin, Bawihte, i rauthla hi.

Dam takin Parte, zamual ka liam ta'ng e,

Kan suli hnu khuarei tawnmang an chang zo ta,

Thal favang lelthang kiu leh chung vanrial rum changin,

I thinlai dawn lungrukah, Bawihte, mi vei ve rawh.

Engtikah dar ang intawng leh ang i maw?

Chung khuanu hual zelin damte'n i leng dun ang;

Khiangawi zamual liam turin leng dang lo kai mah se,

Min lo nghak la, Parte, i zun ngaia uai reng hi.

Sialkhawpui tleitir zaleng zingah hian,

Ka thlang ber che kumtluang run lum nuthai turin;

A chhing zo reng an awm lo ka di Zolenmawii,

Chawi lai thlang tahpuan ang hian, bawihte, i hlui si lo.

(He hla hi Sialsuk hla phuah thiam Pu Laltanpuia'n Pu C Rozama leh Pi Zoliani te inngaihzawn laia  a phuah sak a ni a, a phuah hun lai hian Sialsuk tlangval C Rozama chu Assam Regiment sipaia tangin Shillong-ah a awm a, a ngaihzawng Zoliani hi hetih lai hian Sialsuk nula tleirawl hmeltha ve tak a ni a, an inngai thin hle a ni awm e. A hla chang tawpna lam chang hnih hi a phuahtu Pu Laltanpuia phalnain, C Rozama hian a phuah belh nghe nghe a ni. Tichuan, C Rozama leh Zolianite chu a tawp a tawpah chuan an innei ta a, kum 60 zet lungrual takin nupa kawp chawiin an awm dun a, kum 2026 July ni 1 khan  Pi Zoliani chu an chenna Falkland veng, Aizawl-ah a boralin, a pasal Pu C Rozama leh a fate a kalsan ta a ni.)