KAN TAKSA TLANNA NI

Phuahtu: Evan Lianthangvunga

Satu: Lunglei District UPC Choir, Thangromawia

Awmkhawhar changin ka thlir a, ka ramhlun tur khawpui mawi khi,

Lung man tam leh rangkachak tual nuama ka len ve hun tur;

Beramno enna Zion hmangaihte an kimna chu,

Tawnmanga rauthlaa lengin rinnain ka fang vel thin.

Ka nghakhlel em e, chu hmun angel var te lenna chu,

Lei ram pela ka chenna tur, aw, hmangaihna khawpui chu;

Unau hmangaih, Lalpa kohhran, engthawlna ni lo thleng tur chu,

Kan taksa tlanna ni tur a ni, aw, ka va han nghakhlel em.

Tunah tapin rum mah ila ka Lalpa hnen ka thlen hun chuan,

Ani'n hmangaihna puan nemin ka mittui a hru fai ang;

Aw, chutah tah leh rumna a awm leh tawh ngai lo vang,

He lei hi zawng hnutiang chhawnin chatuanin kan leng tawh ang.

Lalpa hmangaih, a kohhran te he khawvela kan awm chhung hian,

Chau leh retheiin tuar mah ila zam lovin i kal zel ang;

Beramno hnehna ni ropui tlanna ni lo thleng tur chu,

Kan taksa damna ni tur a ni, aw, a va han nuam dawn em.