Kan kar hmangaihna

Satu: C Vanlalzuia

Hmanah panlai hun zawng kha dawn changin,

Nang nen hlim tea lenlai ni zawng kha;

Ngur nun ngai renga chhun ni hmang liamin,

Rairah hringnun e, kan hmang dun thin a.

Hmangaihna dai lo'ng e, nang nen kan karah hian,

A mi leng te'n an dawn phak si lo;

Hmelma anka nem pawh lo hrang mahse,

Kan kar hmangaihna i vul tir zel ang aw.

Khuanu leng zarah ngur nun iang vein,

Nang nen kan tawnmang duhsam tawng vein;

Mahse, hmangaihna dawn phak si lo hian,

Rosum um vang maw, dawt leng an sel le.

Hmangaihna vang hian kei zawng e, bawihte,

Kian rel mai nang e, riakmaw va iang hian;

I tan ka neih zawng ka nun thleng pawh a,

Hlan hi ka tan chuan hlimna, mate.

Kan hlim nan tiin kan dawn thin, mate,

Rosum leh pai zawng nang nen karah;

Sam ang then tirtu mai maw lo ni le,

Panlai hlim ni, aw, ka ngai thin e.