Zopui

Satu: C Vanlalzuia

Hnahkhat lanu emaw ka lo ti che, hmeltha,

Nuthai chang hnu, awih lai nau nen in sumtualah;

Dar ang ka lo tawng che, hrilh ka hai lua e, Zopui,

Kan intawnna khua reng a tlai lua em ni le?

Luah loh tura ka tan khuarel em i lo nih le?

Hriat loh kar leng dang zawhin zamual i liam ta si;

Mahse, tunah leng zawng te'n i sakhmel selin,

An vuah che, 'Thlawi Zopui,' i pam lua e ka ti.

Mahse, i sakhmel chhingzotu lanu zingah,

Ka tawn tawh leng zawng chhiar chhuak mah ila an awm lo;

Ka iai lo che, i sakhming tlang za paw'n sel mahse,

Ka thinlung zawng zawng hian ka hmangaih che asin.

Duhthu ai ang ka lo sam ve thin a, Zopui,

Van zawl chhawrthlapui leh siar leng hmun iangin;

Nang nena runhmun kan len nan tuah thu di hrilin,

I hmangaihna duhawm min hlan ve mai rawh aw.