Ka duatlai Mate

Satu: C Sanga

Partin zawng aia mawi hluani, ka rose par mawite,

Kan run chhung hlimna kungpui kan enning thei lo che;

I nun ze mawi leh hlim hmel te'n lenrualte lunglai a fan thin,

Uangpui chang suh i, a ruk te'n kan chhuang thin che a sin,

Kan lei rosum neichhun pawh i tan tiin, mahse, thinlai a thawng ngei e,

Ka par mawi kungpui thliah ni chu.

Nui hiauvin run i mawi thin chunnu hlim ve nan,

Mahse, a ruk te'n dawn lungruk i lo phang si;

I chunnu hi lunglai ka mawl em ni, enga'n min hrilh loh?

Hnem zo tur che hian min ring lo em ni, i dawn lungruk,

Eng anka lengin nge i lunglai hliam le, fam khawpui hial thlentirtu che chu,

Aw, min dawn ve lo em ni?

I kal hma lua e, kan la tiam lo a sin, bawihte,

Ka zui zel che ka thlah liam che mittui nen;

An zalh che maw, piallei thuahriat hnuaia'n,

Ka zuam lul lo, i tel lo va run lawi leh chu,

Awmhar chhun ni an chang, a zual zel zantlaia'n,

Ka ngai vawng vawng che, ka duatlai Mate.

Kawl a lo ngui, kan runah tah lai ka bang thei lo,

Khartung sawna lo lawi tur hian ka ring che a sin;

Beiseina tak ram chang lo maw ka chan tawk, i chunnu riang hian,

Lenrual zawngte kan run lo lawi e, i tan zai an sa,

Chhan zai reng i rel si lo, khawnge i awm?

Hrilh kan haiin inhnem tur reng hian kan awm si lo, riang runah.

Khuangruah sur e, luaithli nulin ka ko che, Mate,

I zalna piallei dai ka dawn ngam lul lo ve;

Zal puannem ka phah e, lo kir la zan mu chhin leh nan,

Mahte'n ka lum zo lo a sin i belh thin laikhum,

I hlimthla thlira luaithli nul reng mai zawng,

Ka nunna hian a tlin dawn em ni, ka ngai em che a sin.

Lal nunnem, zahngai hram rawh aw,

Ka hrai riangte kha, a pam lua e, a rel sual si a hringnun kalsiam;

Duat te'n lo chawi la i angchhunga'n chunnu thinlai dam ve nan,

Aw, ka hnem zo lo a ni, ka duatlaite kha,

I hnenah chuan a lungmuang ang, hringnun hrehawm ngai lo te'n,

Min hnem ve la, hringnun hlim te'n ka hmang mahna.