Mate kan ngai che (Tlangval heart attack vangin maw)

Phuahtu: Laltanpuii Hnamte

Satu: Laltanpuii Hnamte

I chun leh zua lunglawm kim nan,

Mim ang piangin i rawn seilian a;

Run chhung i va'n tihlim em,

Duat te'n banah vuanin len zai kan rel thin kha, Mate.

Mahse, kan rin phak leh dawn phak rual loh,

Thihna nunrawng chuan i ban a kai ta maw?

I pamhmai lua e, Mate, kan ring phal mawlh lo,

Mahse, lo kir leh tur hian i mawi tawh si lo, aw, Te-a.

I nun ze mawi, i thiamna te,

Kan chhuang asin, i pamhmai lua e;

Kan lei rohlu innghahna ber,

Enga'n kir tawh lo tur a liam min zai rel sak tak mai le?

Damna run pawh i damna a tling zo lo,

Hrilh kan hai lua e;

Lalpa, ni khat chauh tal pawh e, enkawl hun min pe ni la, 

Kan tuar thiam ve deuh tur asin.

I then leh rual, i lungduh te'n,

Kan run kaiin an lam che asin;

Chhawn zai rel zai han rel leh la,

Mahse, lungmawl duhsam mai a ni si maw, Mate.

Lalpa, kan duat lai run rawn lawi kha,

"Ngaiin luaithli nul kan bang thei lo;"

Tiin biahthu min hlan sak nang che aw,

Kan ngai che, Mate, kan ngai vawng vawng che.